Transfer xəbərlərini oxuyanda, yəqin, sən də idmanla məşğul olmağı düşünmüsən. Hər gün idmançıların həyatına baxırsan; sponsorlar, səfərlər, bahalı maşınlar və daha nələr-nələr… Bəs bu hamı üçün keçərlidirmi?

Hə, idmanda pul var, amma hamı üçün yox. Deməyimiz odur ki, sadəcə sürətli olmaq, yaxşı oynamaq, ya da dayanmadan məşq etmək bəs etmir. Pul qazanmaq üçün sən ən yüksək səviyyədə olmalısan, ya da özünü düzgün təqdim etməyi — reklamı bacarmalısan. Əks halda idman sadəcə hobbi olaraq qalır. 

Ən çox qazanan idman növlərinə baxsaq, futbol, basketbol, tennis və döyüş idmanları önə çıxır. Səbəbləri isə aydındır: auditoriya var, sponsor var, nəticədə, pul da var. 

Azərbaycanda vəziyyət bir az daha fərqlidir. Sponsorlar azdır, bazar kiçikdir və media dəstəyi zəifdir. Belə olduğu halda klassik yolla idmandan böyük pullar qazanmaq da çətinləşir. Bu isə yalnız idmançıların yox, həm də ümumi yanaşmanın dəyişməli olduğuna işarədir.

Qeyd etdiyimiz kimi, idmançı olmaq sadəcə istedadlı olmaq deyil. Çox hallarda əsas gəlir yarışlardan yox, reklam əməkdaşlıqlarından, şəxsi proqramlardan və kolleksiya məhsulu satışlarından gəlir. Bir sözlə, idmançı olmaq çətin, pulunu kontentdən qazanmaq daha da çətindir.

Əgər idmandan pul qazanmaq istəyirsənsə, üç məqamı mütləq başa düşməlisən:
1. Təkcə idmançı adını qazanma, özünü göstər və sübut etməyi bacar.
2. Auditoriya = gəlir. Səni nə qədər çox adam tanıyırsa, sən o qədər dəyərlənirsən.
3. Səbirli ol, nəticə almaq vaxt tələb edir.

Sualımızın cavabına gəlsək, bəli, idmanda pul var… Səbirli, planlı və ağıllı olanlar üçün. Düzgün strategiya qurulsa, idman təkcə sağlamlıq yox, həm də ciddi gəlir mənbəyinə çevrilə bilər.

2025-ci ildə ən çox gəlir əldə etmiş idmançıların siyahısına isə bu məqaləmizə keçid edərək baxa bilərsən. Kim bilir, bəlkə, bir gün sənin də adın bu siyahıda yazılacaq.