Fişinq hazırda internetdə ən geniş yayılmış fırıldaqçılıq üsullarından biridir. Fırıldaqçılar istifadəçiləri aldadaraq onların şəxsi məlumatlarını, bank kartı detallarını və hətta hesab şifrələrini ələ keçirmək üçün saxta saytlar yaradırlar. Bu saytlar məşhur markaların və xidmətlərin veb səhifələrinə çox oxşasa da, diqqətlə baxıldıqda fərqli detallar tapmaq mümkündür.

Fişinqin əsas məqsədi istifadəçiləri psixoloji təzyiqlər vasitəsilə tələsik və impulsiv qərarlar qəbul etməyə məcbur etməkdir. Bu, xüsusilə endirim kampaniyaları zamanı “Endirimin sonuna... dəqiqə qalıb”, “Qeydiyyatdan keç, indi hədiyyə qazan!” kimi aldatmacalarla ilə müşayiət olunur. Buna görə də, təhlükəsiz onlayn alış-veriş üçün məlumatlı olmaq vacibdir.

Kiber dələduzlar məşhur mağazaların, bankların, ödəmə xidmətlərinin və s. dizaynını təqlid edən saxta saytlar yaradır. Müxtəlif yollardan istifadə edərək şəxsi məlumatlarını həmin saytlarda paylaşmağa vadar edirlər. Bundan qorunmaq üçün aşağıdakı məqamlara diqqət yetir:

• Linkin düzgünlüyünü yoxla: Fırıldaqçılar belə saytları adətən tanınmış markaların adlarında kiçik hərf dəyişikliyi edərək yaradır. (məsələn, kapitalbank.az əvəzinə kapitanbank.az).
• Dizayna diqqət yetir: Fişinq saytları orijinal saytlara bənzər görünsə də, loqo keyfiyyəti və ya mətnlərdəki qrammatik səhvlərdən məsələni başa düşmək mümkündür.
• Ən ucuz təkliflərə aldanma: Həddindən artıq ucuz qiymətlər təhlükə əlaməti ola bilər. Gördüyün qiymətlərin gerçəkliyini başqa mənbədən yoxla.
• Emosional təsirlərə müqavimət göstər: Fırıldaqçılar səni təcili qərar qəbul etməyə məcbur etmək üçün psixoloji təzyiq metodlarından istifadə edirlər. "Təklif bitmək üzrədir!" kimi ifadələr səni impulsiv addımlar atmağa vadar edə bilər.