Süni intellektlər artıq təkcə şəkillər hazırlamaq, mahnılar tərtib etmək, ya da şeir yazmaq üçün deyil. Onlar gündəlik həyatımızda da əsl köməkçiyə çevrilə bilərlər və bura, təbii ki, maliyyə məsələləri də daxildir.

Süni intellekt sənin üçün xərcləri analiz edir, qənaət yolları göstərir, hətta gələcək xərcləri proqnozlaşdırır. Bir sözlə, pulunu idarə etməkdə sənin sağ əlin olur. Gəl süni intellektin hansı işlərdə sənə kömək ola biləcəyinə yaxından baxaq.

Bankçılıq tətbiqləri ilə xərclərimizi detallı görə bilsək də, bəzi məhdudiyyətlər işimizi çətinləşdirir. Süni intellekt isə bunu avtomatlaşdırır, bütün xərcləri səliqə ilə kateqoriyalara ayırır və sənə “Excel”, ya da istədiyin formatda təqdim edir.

Bu analiz nəticəsində cibindən gizlincə çıxan pullar ortaya çıxır. Məsələn, bu ay heç fərqində olmadan taksiyə 200 AZN xərcləmisən. Bu detalları süni intellekt sənə göstərir və qərar verməyini asanlaşdırır.

Süni intellekt nəinki keçmiş, hətta gələcək xərclərini də analiz edə və proqnozlaşdıra bilər. Məsələn, keçən ay taksiyə 200 AZN vermisənsə, bu ay da oxşar xərc səni gözləyir. Əgər plan qurmusansa və ya ictimai nəqliyyat istifadə edəcəksənsə, məbləğin azalması gözlənilir.

Beləcə, bütün bunları nəzərə alaraq gələn ayın proqnozu sənin üçün hazır olur. Hətta bunu oyuna çevirmək imkanın da var:
Süni intellekt gələn ay 700 xərcləyəcəyini deyir. Görək sən onu 650-ə endirə bilərsən?

Xərclərimizdən xəbər tutduqsa, onlardan nəticə də çıxarmalıyıq. Yəni süni intellekt sənin xərcləmə tərzini və vərdişlərini anlayır və konkret qənaət yolları təklif edir. Adi məsləhətdən fərqli olaraq bu, emosiyalara yox, rəqəmlərə əsaslanır.

Məsələn, süni intellekt sənə deyə bilər:

• Həftədə 3 dəfə yemək sifarişi edirsən, onu 1-ə salsan, ayda 100 AZN yığa bilərsən.
• İdman zalı abunəliyin aktivdir, amma son 2 ayda cəmi 1 dəfə getmisən. Onu ləğv etsən, illik 600 AZN-in cibində qalar.