Sən də maaş karta köçdüyü anda xərcləyənlərdənsən? Səni başa düşürük… Planlanmamış xərclər, “özümü mükafatlandırım” düşüncəsi ilə edilən alış-verişlər və daha çoxu maaşın tez tükənməsinə səbəb olur. Halbuki maaşın köçdüyü gün xərcləmək yox, onu planlamağa başlamaq günüdür. Bir az səbir və nizamla pul elə bizim üçün işləyə bilər. Üstəlik, bu təkcə gənclərə yox, hər yaşdan olan insanlara aiddir.

Odur ki bu məqalədə tanış olacağıq:

• büdcə qurmağın sadə üsulları;
• xərclərə nəzarət etməyin yolları;
• pul yığmaq və planlamaq üçün strategiyalar;
• bizə kömək edəcək alətlər.

Büdcəni planlamaq sadəcə xərclərini tənzimləmək və nə qədər pulun getdiyini bilməklə əlaqəlidir. Ən sadə üsullardan biri isə 50/30/20 qaydasıdır, yəni:

• 50 % — əsas ehtiyaclar (kirayə, ərzaq nəqliyyat)
• 30 % — şəxsi xərclər və əyləncə
• 20 % — yığım və investisiya

Bu üsulu ətraflı öyrənmək və mənimsəmək üçün bu məqaləmizi oxuya bilərsən.

Əksər insanlar qənaət deyəndə sərt kəsintiləri nəzərdə tutur, amma bu davamlı olmur. Əsl qənaət ağıllı xərcləmək və görünməyən xərcləri aşkarlamaqdır. Bəs bunlar hansılardır:

• İstifadə olunmayan abunəliklər (Film, musiqi platformaları və s.);
• Hər gün içilən qəhvələr və lazım olmayan alış-verişlər;
• Eyni məhsulun daha sərfəli alternativləri.